Serbia kthen mbrapsht mërgimtarët shqiptarë në kufi me Kroacinë

Policia kufitare e Serbisë, në kufirin me Kroacinë, ka ndaluar disa vetura me pronarë shqiptarë të Kosovës të cilët po ktheheshin nga vendlindja e tyre për në vendet perëndimore ku jetojnë dhe punojnë.

Një qytetar nga Fushë Kosova (emër i njohur për redaksinë) i ka telefonuar redaksisë së portalit Koha.net për të rrëfyer për maltretimet që po u bëhen mërgimtarëve shqiptarë që po kthehen në vendet e tyre ku jetojnë.

“Unë kalova nga Serbia për në Kroaci, mirëpo pash se tre vetura me emigrantë nga Kosova veçse i kthyen mbrapsht policët serbë në kufi me Kroacinë. Arsyet nuk i di, mirëpo pash se kolona e veturave në pritje për të kaluar në Kroaci ishte 8-10 kilometra”, thotë qytetari i brengosur.

Ai tha se në bazë të kushteve të rrugës dhe kolonës së veturave, pritjet në të mund të jenë deri në 10 orë.