Shaqiri aludon në eliminimin e Shqipërisë, Francës ose Rumanisë

Ylli shqiptar i futbollit zviceran, Xherdan Shaqiri, është përgjigjur në pyetjet e shumta që kanë dalë prej kutisë së qelqit nëpërmjet hashtagut #FragShaqiri, në kuadër të aksionit humanitar “Jeder rappe zählt”.

XS shqiptar ka dhënë një intervistë interesante rreth shortit që ka nxjerrë derbin më interesant në kampionatin Euro 2016 mes ekipit helvetik dhe bijve të shqiponjave.

Helvetikut me rrënjë shqiptare i kërkohet qysh në pyetjen e parë mendimi rreth shortit të grupit A, ku Zvicra do të përballet në lojën kundër Shqipërisë, transmeton albinfo.

Nga pamjet që shihen, Shaqiri është mjaft i relaksuar me këtë short. Ai qesh dhe thotë “E kam ditur që kjo do të jetë pyetja e parë që do më parashtrohet sot. Unë e marr shumë pozitivisht këtë short, ky është natyrisht një grup ku unë do të thosha se ne kemi dalë relativisht mirë të shërbyer, sepse besoj se shanset tona për t’u kualifikuar në këtë grup janë të mëdha. Mirëpo, është e qartë se ky është një turnir ku secili duel do të jetë i vështirë dhe ne duhet të tregojmë lojë të mirë për t’u kulifikuar. Për ne është më rëndësi të kualifikohemi dhe natyrisht ta prezantojmë sa më mirë vendin tonë“, thotë Shaqiri.

Ky grup është i kapërcyeshëm“, thotë ai më tej, “ne jemi zhvilluar shumë mirë, jemi skuadër me shumë të rinj që tani kanë bërë përvojë të mirë së bashku. Besoj se është koha e duhur që në këtë turnir të futemi me synime të qarta dhe mundësisht të provojmë shumë e të paraqitemi si ekip dhe do të kemi sukses. Kualifikimi do të vijë dhe pastaj të shohim, njeriu nuk e di kurrë çfarë do të ndodhë, por ne mund të ëndërrojmë“, deklaron futbollisti me origjinë nga Gjilani i Kosovës.