Shpallet i pafajshëm gazetari Milaim Zeka

Gazetari Milaim Zeka është shpallur i pafajshëm për akuzën zbulim i fshehtësisë zyrtare dhe tentim i pengimit të provuarit në proces gjyqësor sepse nuk është vërtetuar se mes të viti 2013, duke vepruar në bashkëveprim me Rrustem Rukolli, ka zbuluar identitetin e dëshmitarit A, që ka qenë në masa mbrojtëse në rastin Drenica 1 dhe 2, raporton KTV.

Vendimin e ka marrë një trup gjykues i EULEX-it në Gjykatën Themelore të Mitrovicës.

Zeka, që ka një emision në televizionin publik, është akuzuar se ka zbuluar identitetin e Dëshmitarit A në rastin Drenica.

I akuzuar, si aranzhues i takimit të tij me Dëshmitarin A, ka qenë edhe biznesmeni Rrustem Rukolli, pjesë e ekipit mbrojtës të Sami Lushtakut, por prokurori i rastit është tërhequr dje nga akuza për të sepse ka thënë se nuk ka arritur të vërtetojë përfshirjen e tij në këtë çështje.

"Nuk ka asnjë dyshim se Milaim Zeka është takuar me Dëshmitarin A. Por, pyetja kryesore e Gjykatës është se 'a ka mundur që i pandehuri të ndikojë te dëshmitari A që të japë një intervistë dhe për të pranuar se ka qenë dëshmitar në rastin Drenica dhe a është përdorur ndonjë forcë për këtë.
Por Gjykata mendon se kjo ka qenë vetëm insistim e jo presion dhe në këtë insistim ka qenë i përfshirë edhe Murat Musliu dhe jo vetëm i pandehuri", ka thënë kryetarja e trupit gjykues Franciska Fischer.