Arben Islami ka nevojë për votat tona në garën për foton më të mirë në botë (Foto)

Njëri nga entuziastët më të mëdhenj të skijimit në Kosovë, Arben Islami, në një prononcim për Telegrafin tregon se si përmes fotografive duke skijuar (freestyle dhe backcountry), është bërë pjesë e garës ndërkombëtare për fotografinë më të mirë në këto kategori, të organizuar nga revista “Freeskier Magazine”.
“Freeskier Magazine” është revistë prestigjioze e cila shtypet në miliona kopje e që ka për qëllim promovimin e freeride dhe backcountry skijimit (nëpër borë të thellë) në botë”, ka theksuar Islami.
Pasi Arbeni bashkë me shoqërinë e tij në Brezovicë, bëjnë lëshime nëpër shtigje të pjerrëta me borë të thellë, fotografitë e bëra janë shumë konkurrente për llojin e garës që organizon kjo gazetë.

“Unë i kam shiquar shumicën e fotografive të postuara nga fotografët tjerë botëror dhe jam i sigurt se së paku një foto e jona do të jetë ndër më të mirat. Fotografitë më të mira që zgjedhën fituese do të publikohen në numrin e parë të vitit 2016, në revistën ‘Freeskier Magazine”, ka thënë Islami.
Ai tash kërkon mbështetjen e të gjithë miqve dhe dashamirëve për ta votuar atë që të jetë fitues i kësaj gare ndërkombëtare.

Si mund të kontribuojnë ata që dëshirojnë ta ndihmojnë Arbenin në këtë garë:
Fotot duhet të kene një numër të konsiderueshëm të pëlqimeve brenda faqes “Friskier Magazine”, në mënyrë që të hyjnë në grupin e ngushtë të fotove me të mira. Kur të seleksionohen fotografitë që kanë numrin më të madh të pëlqimeve, juria e përbërë nga shumë fotografë profesionistë dhe botues të gazetës, e bëjnë përzgjedhjen e 6 fotografive më të mira. Lajmi do të jepet kah janari i vitit 2016.

Arbeni, ka treguar se si fondi i tij i fotografive është shumë i madh sa i përket kësaj fushe – foto të cilat datojnë nga viti 2003- gjë që e ka shtyrë të jetë edhe pjesë e garës.

“Fotot të cilat i ngarkova në faqen e “Freeskier Magazine”, datojnë nga 2005 deri në 2015, janë rreth 100 sosh. Në vitin 2012, kam marrë pjesë në një garë identike, por të sponzoruar nga kompania Gore – Tex. Aso kohe kam konkurruar me rreth 30 fotografi”, ka thënë Islami.

Ai ka sqaruar se disa muaj pas kësaj gare, ka marrë një e-mail nga organizata më e njohur e discilplinave ekstreme në botë – Teton Gravity Research nga Wyoming në USA, ku iu kumtua lajmi se ai e kishte zënë vendin e parë më fotografitë që i kishte prezantuar.

“Për mua ishte një ditë shumë e veçantë. Ndër 230 fotografi profesionale nga e gjithë bota, fotoja ime doli e para. Të nesërmen me erdhi edhe një e-mail, ku ma kumtuan vendin e dytë dhe të pasnesërmen, edhe vendin e katërt. Pra, nga 4 vendet e shpërblyera (një kryesore dhe tri follow up), tri fotografitë e mija ishin të shpërblyera. Pas kësaj kohe, fillova ta trajtoj me më seriozitet çështjen e fotografive, kështu që pas një viti, botova edhe librin e parë me fotografi nga natyra dhe skijimi ‘Pure Kosovo”.
Islami ka theksuar se “një vit pas, hyra edhe në një garë tjetër dhe mora vendin e pestë në botë në garën e organizuar nga “Teton ‘Gravity Research’ për snowboard foton më të mirë”.

“Në vitin 2014 e botova edhe librin e dytë ‘Kosova Madhështore Vol. 1’, ku në brendësi të librit, përveç natyrës publikova edhe foto nga skijimi dhe lëshimi më snowboard”, ka thënë ai.

Islami ka theksuar se pasi shoqata e skijimit alternativ “Snow Njeri” është një ndër shoqatat më të popullarizuara në Kosovë, fotografitë që i bëjnë dhe i postojnë në internet, zgjojnë interes nga qindra mijëra të rinj anembanë Kosovës, Maqedonisë, Malit të Zi, por sipas tij, këto fotografi zgjojnë interes edhe në rajonin tjera të Ballkanit.

“Shumë njerëz në Kosove dhe botë e njohin Brezovicën dhe lëshimet ekstreme ekskluzivisht përmes fotove të ‘Snow Njeri’. Maqedonët kohëve të fundit e vizitojnë shumë Kosovën, për të bërë ski, duke iu referuar fotografive dhe videove të ‘Snow Njerit”, ka thënë ai.

Arben Islami, si konkurrentë në këtë garë, njëherësh kryetar i shoqatave të “Snow Njeri” dhe “Hiking Njeri”, shpreson që edhe këtë herë do ta fitojë ndonjë vend ndër më të mirët.